ਮਾਤਾ ਚੇਤੇ ਆਉਂਦੀ ਏ
ਜਿਹਦੇ ਕਪੜੇ ਗੰਦੇ ਕਰਦਾ ਸੀ
ਜਿਹਦੀ ਉਂਗਲੀ ਫੜ ਕੇ ਚਲਦਾ ਸੀ
ਜਿਹੜੀ ਮੈਨੂੰ ਲਾਡ ਲੜਾਉਂਦੀ ਸੀ
ਜਿਹੜੀ ਮੇਰੇ ਸਦਕੇ ਪਾਉਂਦੀ ਸੀ
ਜਿਹਦੀ ਗੁੱਤਾਂ ਖਿਚ ਖਿਚ ਹਸਦਾ ਸੀ
ਜਿਹਦੀ ਅਖੀਆਂ ਵਿੱਚ ਮੈਂ ਵਸਦਾ ਸੀ
ਜਿਹਦੇ ਆਲੇ ਦੁਆਲੇ ਨੱਚਦਾ ਸੀ
ਜਿਹਦੇ ਤਰਲੇ ਕਰ ਕਰ ਹਸਦਾ ਸੀ
ਓ ਮਾਤਾ ਚੇਤੇ ਆਉਂਦੀ ਹੈ .
ਜਿਹੜੀ ਵਸਦੇ ਘਰ ਚੋਂ ਆਈ ਸੀ
ਜਿਹੜੀ ਵਸਦੇ ਘਰ ਵਿੱਚ ਆਈ ਸੀ
ਜਿਹੜੀ ਗਹਣੇ ਕਈ ਲਿਆਈ ਸੀ
ਜਿਹੜੀ ਸਭ ਦੇ ਸ਼ਗਨ ਮਨਾਂਦੀ ਸੀ
ਜਿਹੜੀ ਘਰ ਵਿੱਚ ਪੈੱਲਾਂ ਪਾਉਂਦੀ ਸੀ
ਜਿਹੜੀ ਮਝੀਆਂ ਗਾਵਾਂ ਚੋੰਦੀ ਸੀ
ਜਿਹੜੀ ਖੂਹ ਚੋਂ ਪਾਣੀ ਭਰਦੀ ਸੀ
ਜਿਹੜੀ ਗਾਗਰ ਚੁਕ ਕੇ ਨਸਦੀ ਸੀ
ਓ ਮਾਤਾ ਚੇਤੇ ਆਉਂਦੀ ਏ ..
ਉਹ ਉਠਦੀ ਤੜਕੇ ਤੜਕੇ ਨੀ
ਉਹ ਪਾਣੀ ਭਰਦੀ ਤੜਕੇ ਨੀ
ਉਹ ਦੁਧ ਬਿਲੋੰਦੀ ਤੜਕੇ ਨੀ
ਉਹਦੀ ਚੂੜੀ ਖੰਨਕੇ ਤੜਕੇ ਨੀ
ਉਹ ਚੁੱਲ੍ਹਾ ਬਾਲੈ ਤੜਕੇ ਨੀ
ਉਹ ਨਿਆਣੇ ਜਗਾਉਂਦੀ ਤੜਕੇ ਨੀ
ਉਹ ਧੱਫੇ ਮਾਰੇ ਤੜਕੇ ਨੀ
ਉਹ ਸਭ ਨੂੰ ਝਿੜਕੇ ਤੜਕੇ ਨੀ
ਅਸੀਂ ਰੋਂਦੇ ਰੋਂਦੇ ਉਠਦੇ ਨੀ
ਅਸੀਂ ਰੋਂਦੇ ਰੋਂਦੇ ਨਾਹੁੰਦੇ ਨੀ
ਉਹ ਸਾਡੇ ਕੱਜਲ ਪਾਂਦੀ ਨੀ
ਉਹ ਕੰਨਾਂ ਓਹਲੇ ਟਿੱਕਾ ਲਾਉਂਦੀ ਨੀ
ਉਹ ਸਾਡੇ ਕੇਸ਼ ਬਣਾਉਂਦੀ ਨੀ
ਉਹ ਕਪੜੇ ਪੁਆਉਂਦੀ ਨੀ
ਓ ਮਾਤਾ ਚੇਤੇ ਆਉਂਦੀ ਏ ..
ਉਹ ਮਖਣ ਦੇਂਦੀ ਹੱਸ ਹੱਸ ਕੇ
ਉਹ ਦੁਧ ਪਿਆਉਂਦੀ ਭਰ ਭਰ ਕੇ
ਜਦ ਬਾਲਕ ਦੁਧ ਨਾ ਪੀਂਦੇ ਸੀ
ਓਹ ਘੂਰੀ ਵੱਟ ਕੇ ਆਉਂਦੀ ਸੀ
ਓਹ ਮੁੱਕਿਆਂ ਚੱਕ ਕੇ ਆਉਂਦੀ ਸੀ
ਓਹ ਬੇਲਨਾ ਚੱਕ ਕੇ ਆਉਂਦੀ ਸੀ
ਓਹ ਦੋ ਦੋ ਧੋਲ ਜਮਾਉਂਦੀ ਸੀ
ਓਹ ਧੱਕੇ ਨਾਲ ਖਵਾਉਂਦੀ ਸੀ
ਉਹਦੇ ਝਿੜਕੇ ਤੋਂ ਅਸੀਂ ਡਰਦੇ ਸੀ
ਓ ਮਾਤਾ ਚੇਤੇ ਆਉਂਦੀ ਏ ..
ਦਿਨ ਚੜਦਾ ਜਾਂਦਾ ਸੀ
ਸਭ ਕੰਮੀ ਜਾਂਦੇ ਸੀ
ਕੋਈ ਖੇਤੀਂ ਜਾ ਬਹਿੰਦਾ
ਕੋਈ ਹੱਟੀ ਜਾ ਬਹਿੰਦਾ
ਉਹ ਵਿਹਲੀ ਹੋ ਕੇ ਫਿਰ
ਕੁਝ ਸੋਚੀਂ ਪੇਂਦੀ ਸੀ
ਦਰਾਨੀ ਆ ਬਹਿੰਦੀ
ਜਠਾਣੀ ਆ ਬਹਿੰਦੀ
ਓ ਗੱਲਾਂ ਕਰਦੀ ਬੀ
ਕੰਮ ਕਰਦੀ ਜਾਂਦੀ ਸੀ
ਓ ਚੋੰਕਾ ਸਾਫ਼ ਕਰੇ
ਓ ਚੁੱਲ੍ਹਾ ਸਾਫ਼ ਕਰੇ
ਥਪ ਥਪ ਥਾਪੀ ਨਾਲ
ਓ ਕਪੜੇ ਸਾਫ਼ ਕਰੇ
ਓ ਪਾਥੀਆਂ ਪਥਦੀ ਸੀ
ਓ ਸਾਰੇ ਵਿਹੜੇ ਨੂੰ
ਗੋਹੇ ਨਾਲ ਲਿਪਦੀ ਸੀ
ਓ ਮਾਤਾ ਚੇਤੇ ਆਉਂਦੀ ਏ ..
ਅਸੀਂ ਸਕੂਲੋਂ ਆ ਜਾਂਦੇ
ਓਹਦੀ ਗੋਦੀ ਬਹਿ ਜਾਂਦੇ
ਓਹ ਬਸਤਾ ਟੰਗ ਦੇਂਦੀ
ਓਹ ਫੱਟੀ ਧੋ ਦੇਂਦੀ
ਓਹ ਰੋਟੀ ਪਾ ਦੇਂਦੀ
ਰੋਟੀ ਖਾ ਖੂ ਕੇ --
ਅਸੀਂ ਖੇਲਣ ਜਾਂਦੇ ਸੀ
ਓਹ ਬਾਟਾਂ ਤਕਦੀ ਸੀ
ਓ ਮਾਤਾ ਚੇਤੇ ਆਉਂਦੀ ਏ ..
ਜਦ ਮੇਲਾ ਆ ਜਾਵੇ
ਦਿਵਾਲੀ ਆ ਜਾਵੇ
ਦੁਸ੍ਹੇਰਾ ਆ ਜਾਵੇ
ਤਿਯਾਂ ਆ ਜਾਵਣ
ਛਿੰਝਾਂ ਆ ਜਾਵਣ
ਕੋਈ ਲੋਹੜੀ ਆ ਜਾਵੇ
ਕੋਈ ਹੋਲੀ ਆ ਜਾਵੇ
ਕੋਈ ਪੱਲਾ ਫੜ ਲੇੰਦਾ
ਕੋਈ ਉੰਗਲੀ ਫੜ ਲੈਂਦਾ
ਕੋਈ ਅੱਗੇ ਟੁਰਦਾ ਨੀ
ਕੋਈ ਪਿੱਛੇ ਟੁਰਦਾ ਨੀ
ਕੋਈ ਹਸਦਾ ਜਾਵੇ ਨੀ
ਕੁਝ ਮੰਗਦਾ ਜਾਵੇ ਨੀ
ਓ ਸਾਰੇ ਨਿਆਂਨਿਆਂ ਨੂੰ
ਮੇਲੇ ਲੈ ਜਾਂਦੀ ਸੀ
ਕੋਈ ਗੁੱਡੀ ਲੈ ਬਹਿੰਦਾ
ਕੋਈ ਹਾਥੀ ਲੈ ਬਹਿੰਦਾ
ਘੀਸੁ ਦੀ ਰੇਹੜੀ ਤੇ
ਓ ਗੋਪਗੱਪੇ ਖਾਂਦੀ ਸੀ
ਕੋਈ ਸੂਤਕ ਆ ਜਾਵੇ
ਕੋਈ ਪਾਤਕ ਆ ਜਾਵੇ
ਸਾਰੇ ਘਰ ਦੇ ਕੰਮ ਓਹ
ਆਪ ਕਰਾਉਂਦੀ ਸੀ
ਓ ਮਾਤਾ ਚੇਤੇ ਆਉਂਦੀ ਏ ..
ਜਦ ਜਾਏ ਓਸ ਦੇ ਨੀ
ਕੁਝ ਲੰਬੇ ਹੋਏ ਨੀ
ਕੁਝ ਤਕੜੇ ਹੋਏ ਨੀ
ਕੁਝ ਉੱਚੇ ਹੋਏ ਸੀ
ਕੁਝ ਵੱਡੇ ਹੋਏ ਸੀ
ਕੋਈ ਮਾਸ਼ਟਰ ਬਣ ਬੈਠਾ
ਕੋਈ ਹੱਟੀ ਜਾ ਬੈਠਾ
ਤੱਦ ਮਾਤਾ ਸਾਡੀ ਨੇ
ਫਿਰ ਐਨਕ ਲਾਈ ਸੀ .
ਉਸ ਮਾਮੇਂ ਸੱਦੇ ਨੀ
ਉਸ ਮਾਮੀਆਂ ਸੱਦੀਆਂ ਨੀ
ਉਸ ਮਾਸੀ ਸੱਦੀ ਨੀ
ਉਸ ਮਾਸੜ ਸੱਦਿਆ ਨੀ
ਚਾਚੀਆਂ ਤਾਈਆਂ ਨੂੰ
ਉਸ ਹਾੱਕਾਂ ਮਾਰੀਆਂ ਨੀ
ਮੁੰਡੇ ਵਿਆਓਨ ਲਈ
ਮੁਟਿਆਰਾਂ ਲਭੋ ਨੀ
ਘਰ ਚੰਗਾ ਤੱਕੋ ਨੀ
ਕੁੱਲ ਉੱਚਾ ਲਭੋ ਨੀ
ਓਹ ਗੋਰੀਆਂ ਵੀ ਹੋਵਣ
ਓਹ ਸੋਹਣਿਆਂ ਵੀ ਹੋਵਣ
ਓਹ ਲੰਬੀਆਂ ਵੀ ਹੋਵਣ
ਓਹ ਉੱਚੀਆਂ ਵੀ ਹੋਵਣ
ਓਹ ਪੜ੍ਹਿਆਂ ਬੀ ਹੋਵਣ
ਓਹ ਜਚੀਆਂ ਵੀ ਹੋਵਨ
ਕੁਝ ਲੇਣਾ ਦੇਣਾ ਨਹੀਂ
ਕੋਈ ਦਾਜ ਦਹੇਜ ਨਹੀਂ
ਬਸ ਇਕ ਰੋਟੀ ਦੇਣੀ ਏ
ਤਿੰਨਾ ਕਪੜਿਆਂ ਵਿੱਚ
ਧੀ ਸਾਡੀ ਹੋਣੀ ਏ .
ਕੋਈ ਸ਼ਰਤ ਨਾ ਲਾਇਓ ਨੀ
ਕੋਈ ਬਾਤ ਨਾ ਰਖਿਓ ਨੀ
ਘਰ ਨੁਹਾਂ ਲਿਆਓਣ ਦੀ
ਓ ਕਰੇ ਤਿਆਰੀਆਂ ਨੀ
ਓ ਮਾਤਾ ਚੇਤੇ ਆਉਂਦੀ ਏ ..
ਚਾ -ਚਾ ਦੇ ਵਿਚ ਆ
ਉਸ ਸੱਦੇ ਪਾਏ ਨੀ
ਦਾਦਕੇ ਆਏ ਨੀ
ਸਭ ਨਾਨਕੇ ਆਏ ਨੀ
ਘਰ ਭਰਿਆ ਹੋਇਆ ਸੀ
ਘਰ ਮੇਲਾ ਲਗਾ ਸੀ
ਨਿਤ ਗਾਣੇ ਵੱਜਦੇ ਸੀ
ਨਿਤ ਢੋਲਕੀ ਵੱਜਦੀ ਸੀ
ਭੈਣਾ ਵੀ ਨੱਚੀਆਂ
ਭਰਜਾਈਆਂ ਵੀ ਨੱਚੀਆਂ
ਚਾਚਿਆਂ ਵੀ ਨੱਚੀਆਂ
ਬੁਡ੍ਦੀ ਹੋ ਚੁਕਿਆਂ ਸਾਡੀ
ਸਬ ਤਾਈਆਂ ਵੀ ਨੱਚੀਆਂ
ਲੈ ਲੈ ਬਲਾਵਾਂ ਫਿਰ
ਉਸ ਨੂਹਾਂ ਲਿਆਇਆਂ ਸੀ
ਵਾਰ ਵਾਰ ਕੇ ਪਾਣੀ --
ਉਸ ਨਜਰਾਂ ਉਤਾਰੀਆਂ ਸੀ
ਓ ਮਾਤਾ ਅਜ ਚੇਤੇ ਆਉਂਦੀ ਏ ..
ਫਿਰ ਪੋਤੇ ਜੰਮ ਪਏ
ਫਿਰ ਪੋਤਿਆਂ ਜੰਮ ਪਈਆਂ
ਫਿਰ ਦੋਹਤੇ ਵੀ ਆਏ
ਦੋਹਤਿਆਂ ਜੰਮ ਪਇਆਂ
ਮਾਂ ਦੀ ਖ਼ੁਸ਼ੀਆਂ ਸਭ
ਚੁਬਾਰੇ ਚੜ੍ਹ ਪਇਆਂ
ਨਿਤ ਸ਼ਗਨ ਮਨਾਵੇ ਓ
ਨਿਤ ਮੰਦਿਰ ਜਾਵੇ ਓ
ਨਿਤ ਮੱਥਾ ਟੇਕੇ ਓ
ਨਿਤ ਰੱਬ ਮਨਾਵੇ ਓ
ਸਾਰੇ ਘਰ ਦੀ ਰਖਿਆ ਲਈ
ਨਿਤ ਹਵਨ ਕਰਾਵੇ ਓ
ਘਰ ਲੋਰੀਆਂ ਲੋਰੀਆਂ ਨੀ
ਘਰ ਟੱਪੇ ਟੱਪੇ ਨੀ
ਘਰ ਗੀਤ ਗੁੰਜਾਰਾਂ ਨੀ
ਘਰ ਮਾਨ ਮੁਹਾਰਾਂ ਨੀ
ਕਿਤੇ ਚਾੰ ਚਾੰ ਹੁੰਦੀ ਸੀ
ਕਿਤੇ ਮਾਂ ਮਾਂ ਹੁੰਦੀ ਸੀ
ਕਿਤੇ ਕਪੜੇ ਫੱਬਦੇ ਸੀ
ਕਿਤੇ ਗਹਣੇ ਸੱਜਦੇ ਸੀ
ਓ ਮਾਤਾ ਅਜ ਚੇਤੇ ਆਉਂਦੀ ਏ ..
ਇਹ ਸਭ ਖੁਸ਼ੀਆਂ ਬਸ
ਚਾਰ ਦਿਨ ਆਈਆਂ ਸੀ
ਦੁਖਾਂ ਦੀਆਂ ਘੜਿਆਂ
ਹੁਣ ਲਾਗੇ ਖੜਿਆਂ ਸੀ
ਓਹ ਦਿਨ ਚੰਦਰਾ ਸੀ
ਚੜ੍ਹ ਮਥੇ ਲਗਾ ਸੀ
ਸਭ ਨਰਕੀ ਪੈ ਗਏ ਸੀ
ਸਭ ਰੋਂਦੇ ਰਹਿ ਗਏ ਸੀ
ਘਰ ਹੋਉਕਾ ਲੱਗਾ ਸੀ
ਘਰ ਸਰਾਪ ਲੱਗਾ ਸੀ
ਘਰ ਮਸਿਆ ਆਈ ਸੀ
ਘਰ ਨੇਹ੍ਹਰਾ ਪਿਆ ਸੀ
ਚੁਪ ਚੁਪੀਤੇ ਹੀ
ਬਾਪੂ ਤੁਰ ਬੈਠਾ ਸੀ
ਮਾਂ ਰੋਂਦੀ ਜਾਵੇ ਨੀ
ਮਾਂ ਝੂਰਦੀ ਜਾਵੇ ਨੀ
ਮਾਂ ਮਰਦੀ ਜਾਵੇ ਨੀ
ਮਾਂ ਟੁਟਦੀ ਜਾਵੇ ਨੀ
ਮਾਂ ਮਾਰ ਦਹਾੜਾਂ ਨੀ
ਮਾਂ ਡਿਗਦੀ ਜਾਵੇ ਨੀ
ਮਾਂ ਰੋਟੀ ਨਾ ਖਾਵੇ ਨੀ
ਮਾਂ ਪਾਣੀ ਨਾ ਪੀਵੇ ਨੀ
ਮਾਂ ਰਾਤੀੰ ਨਾ ਸੋੰਵੇ ਨੀ
ਮਾਂ ਦਿਨੇ ਨਾ ਬੈਠੇ ਨੀ
ਉਸ ਹਓਕਾ ਭਰਦੀ ਨੀ
ਕੁਝ ਸਾਲ ਬਿਤਾਏ ਨੀ
ਘਰ ਬਿਖ਼ਰ ਗਿਆ ਸੀ
ਘਰ ਉਜੜ ਗਿਆ ਸੀ
ਭਰਾ ਖਿਚੇ ਖਿਚੇ ਸੀ
ਏ ਮਸਿਆ ਨਾ ਮੁਕਦੀ ਸੀ
ਮਾਤਾ ਕਲਪਦੀ ਰਹਿੰਦੀ ਸੀ
ਮਾਤਾ ਡੁਸਕਦੀ ਰਹਿੰਦੀ ਸੀ
ਘਰ ਫੁੱਟਾਂ ਫੁੱਟਾਂ ਸੀ
ਘਰ ਟੁੱਟਾ ਟੁੱਟਾ ਸੀ
ਉਸ ਧੀਆਂ ਨੇ ਲੁੱਟਿਆ
ਉਸ ਭਰਾਵਾਂ ਨੇ ਲੁੱਟਿਆ
ਕੋਈ ਗਹਣੇ ਲੈ ਗਿਆ
ਕੋਈ ਪੈਸੇ ਲੈ ਗਿਆ
ਕੋਈ ਕਪੜੇ ਵੰਡ ਬੈਠਾ
ਕੋਈ ਵਿਹੜਾ ਮੱਲ ਬੈਠਾ
ਓਨ੍ਨਾਂ ਭਾਂਡੇ ਵੰਡ ਲਏ
ਓਨ੍ਨਾਂ ਕਮਰੇ ਵੰਡ ਲਏ
ਓਨ੍ਨਾਂ ਚੋਂਕਾ ਵੰਡ ਲਿਆ
ਓਨ੍ਨਾਂ ਚੂਲ੍ਹਾ ਵੰਡ ਲਿਆ
ਮਾਂ ਚੁਪ ਚੁਪਿਤੀ ਸੀ
ਸਭ ਤੱਕੀ ਜਾਂਦੀ ਸੀ
ਮਾਂ ਮਾਰਦੀ ਜਾਂਦੀ ਸੀ
ਓ ਮਾਤਾ ਅਜ ਚੇਤੇ ਆਉਂਦੀ ਏ ..
ਮੈ ਸਮਝਾਓਂਦਾ ਰਹਿੰਦਾ ਸੀ
ਓ ਗੱਲ ਨਾ ਸੁਣਦੀ ਸੀ
ਬਾਪੁ ਦੇ ਮੰਜੇ ਤੇ
ਓ ਗੀਤਾ ਪੜ੍ਹਦੀ ਸੀ
ਉਸ ਗੀਤਾ ਪੜ੍ਹਦੀ ਨੇ
ਇਕ ਹਿਚਕੀ ਮਾਰੀ ਸੀ
ਉਸ ਲੰਬੀ ਹਿਚਕੀ ਤੇ
ਮਾਂ ਭਰੀ ਉਡਾਰੀ ਸੀ
ਇਹ ਦੁਨੀਆ ਕਿਦਾਂ ਦੀ ?
ਇਹ ਦੁਨੀਆ ਇਦਾਂ ਦੀ
ਨਾ ਬਾਪ ਪਿਆਰਾ ਏ
ਨਾ ਮਾਂ ਪਿਆਰੀ ਏ
ਬਸ ਧਨ ਪਿਆਰਾ ਏ
ਬਸ ਘਰ ਪਿਆਰਾ ਏ
ਅਪਣਾ ਆਪ ਪਿਆਰਾ ਏ
ਹੰਕਾਰ ਪਿਆਰਾ ਏ
ਰੱਬ ਵਰਗੀ ਨਾ ਮਾਂ ਪਿਆਰੀ ਏ
ਓ ਮਾਤਾ ਅੱਜ ਮੇਰੇ ਚੇਤੇ ਆਉਂਦੀ ਏ .........ਅਰਵਿੰਦ